Pelayo e o peixe cebra axudan na investigación das enfermidades raras
Os grupos Zebrabiores e Gapavet, membros de BioReDes, poñen en marcha un proxecto de crowfunding co fin de desenvolver un modelo en peixe cebra que permita descubrir as claves que orixinan os defectos conxénitos de glicosilación e avanzar no estudo das enfermidades raras.
Os equipos das investigadoras Laura Sánchez e María Isabel Quiroga acaban de poñer en marcha o proxecto "Pelayo e o peixe cebra axudan na investigación das enfermidades raras". A iniciativa de crowfunding está aberta á participación cidadá na plataforma Precipita da Fecyt.
A motivación do proxecto inspirado en Pelayo é alimentar a esperanza deste neno de dous anos que loita por seguir adiante e que espera que un pequeno peixe, xenéticamente modificado, poida lanzar luz sobre a súa enfermidade e contribuír á procura dun tratamento para todos os nenos afectados por unha variante 'ultra-rara' de CDG asociada a unha mutación recesiva do xene RFT1, da que soamente se describiron 18 casos no mundo.
O grupo de investigación Zebrabiores da USC, liderado por Laura Sánchez e que traballa no desenvolvemento de modelos de peixe cebra para diferentes enfermidades humanas como a síndrome de Charge, a síndrome de Treacher Collins, o autismo ou a ataxia da Costa da Morte, e o grupo de Anatomía Patolóxica Veterinaria (Gapavet), un equipo de anatomopatólogos veterinarios especialistas en enfermidades de peixes, dirixido por Maribel Quiroga, levan a coordinación dun proxecto que tamén implica directamente outro persoal técnico e investigador da USC: Ana Quelle, Nerea Gandoy, Sandra Maceiras, Mónica Otero, Roberto Bermúdez, Ana Losada e Ana Manuela de Azevedo.
Desde BioReDes animamos a toda a cidadanía a achegar a súa contribución e apostar pola boa investigación.