Novas ferramentas na loita contra os incendios forestais
Stéfano Arellano desenvolve na súa tese de doutoramento, dirixida por Ana Daría Ruiz, do grupo UXAFORES da Agrupación Estratéxica de Investigación do Campus Terra da USC, BioReDes, e José Antonio Vega, do Centro de Investigación Forestal de Lourizán, modelos de estimación de carga de combustible dispoñible para propagar o lume no dosel arbóreo.
Stéfano Arellano acaba de defender a súa tese doutoral, que leva por título: "Caracterización do combustible do dosel arbóreo mediante sensores remotos e avaliación do efecto das claras sobre o comportamento e a severidade potenciais do lume en piñeirais do NO de España". Este traballo deu pé ao desenvolvemento de modelos para estimar a carga de combustible dispoñible para a propagación do lume no dosel arbóreo e a forma en que se distribúe entre o ápice e a base das copas, tanto a partir de datos LIDAR como de variables de rodal medidas no campo.
O investigador gozou dunha bolsa de mobilidade de BioReDes, coa que puido realizar unha estancia no Centro de Estudos Florestais da Universidade de Lisboa, que completou a súa formación. Felicidades!