Os sistemas silvopastorais son un aliado contra o cambio climático na Europa mediterránea
Francisco Javier Rodríguez Rigueiro analiza na súa tese, dirixida polas profesoras Rosa Mosquera e Nuria Ferreiro, do grupo SILVOPAST, da Agrupación Estratéxica de Investigación do Campus Terra da USC, BioReDes, os sistemas de manexo e cultivo das superficies agrarias e forestais e inclúe un estudo que proba a viabilidade de uso de lodos de depuradora como alternativa de fertilización agroforestal.
Francisco Javier Rodríguez Rigueiro acaba de defender a súa tese doutoral, que leva por título "Innovación agroforestal e PAC, incidencia nos ámbitos do cambio climático, a bioeconomía e a economía circular". A tese analiza o alcance das prácticas silvoarables e os pastos permanentes na área mediterránea de Europa incluíndo un estudo dos programas de desenvolvemento rural (PDR). As pescudas realizadas están aliñadas cos obxectivos que persegue a UE a través da nova Política Agraria Común (PAC), así como doutros instrumentos políticos cos que trata de mitigar os efectos do cambio climático ademais de promover a adaptación das explotacións agrícolas a este tipo de prácticas.